عيد بدون الوالده مالنا فيه . . .

**ali** الثلاثاء أغسطس 11, 2009 4:40 am

كلِّن يعايد باول العيد غاليه . . . . . . وعيدي من الفرقا الدموع الثمينه
احدن يعايد بين ربعه واهاليه . . . . . . واحدن يعايد بالسجون الحصينه
عيدن عسى ربي يزيّن مساعيه . . . . . . لو انها في داخل السجن شينه
عيدن بدون الوالدة مالنا فيه . . . . . . لو زانت ايامه فلا هيب زينه
العيد والله شوفة امي وطاريه . . . . . . وتقبيلة إيديها بذِّلن ولينه
يامن يعايد لي عليها واجازيه . . . . . . في دعوتن لله بيني وبينه
يقول يالقلب الرحوم ومعانيه . . . . . . يامهجة الممدوح يانور عينه
عيدن عليك يعود باحلى لياليه . . . . . . وعيدن عليك يعود بامن وسكينه
ياعيد قلبي ونوره اللي مقديه . . . . . . يالهفة اشواقه وزفرة حنينه
يامنبع العطف الصدوق ومجاريه . . . . . . ياذا الحنان اللي يتدفق بحينه
ياجنتي وبستان قلبي وواليه . . . . . . ياريحة الفردوس الاعلى وطينه
ياعزي السامي وهيبة معاليه . . . . . . ياروح روحي والخفوق وضنينه
يامكسبي ياراس مالي وصافيه . . . . . . ياغيث قلبي ياعطاه وعوينه
يامْ الجَنَان اللي تزاحم حسانيه . . . . . . ياقمة الحب المخلّد بعينه
ياقرْة فوادي وغاية مرابيه . . . . . . العبد مكتوب القدر في جبينه
العذر ياسلطان قلبي وحاميه . . . . . . ممدوح ماغير الحديد بيدينه
بين الشبوك اعايد الدمع واخفيه . . . . . . ياعيد عيد الغلغلة والضغينه
العيد عندي سامياتن معانيه . . . . . . لكنها بالسجن ضيم وضغينه
العيد لو هو عيد ماالله محلّيه . . . . . . إليا ابعد المخلوق عن والدينه
والله يالولا واحدٍ فوق نرجيه . . . . . . ماصبر على فرقا الحنون الرزينه
يوم اذكر امي نور داري وراعيه . . . . . . ابكي وانا كبدي من الله متينه
قلبي ثلاث سنين والبعد طاويه . . . . . . ماشفتها والعيد ويني ووينه
عيدن يزوّد هم قلبي ويدميه . . . . . . يصبح ويمسي عبرته في وتينه
ياعيد قلبي نار الاشواق تكويه . . . . . . وانته تنقّض بالجروح الدفينه
نقضت جرحن بين الاضلاع كاميه . . . . . . وابكيت عينن من جداها حزينه
ذكّرتني ياعيد ماكنت ناسيه . . . . . . وخليتني لجروح قلبي رهينه
جرحن جرحته واجب إنك تداويه . . . . . . لايصبح الموت المصفّى خدينه
يوم آتذكّر طول عمري وماضيه . . . . . . خطرن على قلبي يبيّح كنينه
يتوق قلبي لاتذكّر مغانيه . . . . . . فالبر والاّ في ربوع المدينه
عمرٍ مضى بين الرجال المداليه . . . . . . الله يعوض ماغدا من سنينه
ويالله ياللي دبرة الخلق بيديه . . . . . . ترفع لنا بامرك شراع السفينه

مع تحيات
علي طنينه
:pale: :pale: